Аввал хабар берганимиздек, BMB Trade Group компанияси бош директорининг биринчи ўринбосари Мирғулом Усманов Италиянинг Рим шаҳрида хизмат сафарида бўлиб турибди.
Мамлакатимизнинг Италиядаги ваколатхонаси ва шахсан Фавқулодда ва муҳтор элчи Отабек Акбаров кўмагида М.Усманов озиқ-овқат маҳсулотларини қайта ишлаш тизими истиқболларига бағишланган Snack the system бошланғич босқичда бўлган озиқ-овқат тизимларини ўзгартириш бўйича интерактив кўргазмасида иштирок этди.
Мазкур тадбир Швейцариянинг Италиядаги элчихонаси, БМТ ва Швейцария давлати ҳукумати томонидан уюштирилиб, Италия пойтахти Рим шаҳрининг «I Casali del Pino» органик агротуризм кўргазмалар залида бўлиб ўтди. Кўргазма ёш инноваторларни қишлоқ хўжалиги маҳсулотларини ишлаб чиқариш циклидаги жараёнларга кенгроқ жалб қилиш ва уларнинг янги ғояларини эшитиш учун қулай платформага айланди.
Кўргазма давомида Италиянинг машҳур музқаймоқ ишлаб чиқарувчилари Ўзбекистонда BMB Za’faron бренди остида етиштирилаётган табиий заъфарон ўсимлиги қўшилган музқаймоқ тайёрладилар.
Қатнашчилар илк бор заъфарон қўшилган музқаймоқ ширинлигини татиб кўриб, жуда ҳам илиқ қабул қилдилар ва келажакда бундай янги ғояларни кенгроқ хаётга татбиқ этиш мақсадида бир қатор музокаралар ўтказдилар.
Умуман олганда, бундай нуфузли кўргазма Италия ва бошқа давлатлардан келган бизнес-ҳамкорлар билан савдо-иқтисодий алоқаларни кенгайтириш, ёш мутахассисларни ушбу соҳага янада кенгроқ жалб қилиш ҳамда BMB Za’faron бренди остидаги маҳсулотни жаҳон бозорида танитишга хизмат қилади.
