Мамлакатимизда кейинги йилларда жисмоний тарбия ва спортни ривожлантириш, аҳолини спортнинг оммавий турларига жалб қилиш, хусусан, ёшлар ва болалар ўртасида жисмоний тарбия ва спортнинг оммавийлигини ошириш, шунингдек, соғлом турмуш тарзини кенг тарғиб қилиш борасидаги ишлар янги ва қизғин босқичга кўтарилди.
Ҳукуматимиз томонидан ёшлар ва болалар ўртасида спортни оммавийлигини ошириш ва аҳоли ўртасида соғлом турмуш тарзини кенг тарғиб қилишда амалга оширилаётган лойиҳалар ўзининг самарасини бера бошламоқда.
Биргина шахмат бўйича Ўзбекистон миллий жамоасининг Ҳиндистоннинг Ченнай шаҳрида ўтказилган шахмат олимпиадасида биринчи ўринни эгаллаши минглаб ёшларни спортнинг ушбу тури билан шуғулланишига туртки берди.
Ҳеч қандай куч ва восита мамлакатни спорт каби тез дунёга танита олмайди.
Спорт сарҳад билмас мафкура, инсонни камолотга бошлайдиган кучдир.
Бугунги кунда мамлакатимизда юқори иқтидорга эга бўлган ёш футболчиларни танлаш, саралаб олиш (селекция) тизими ва футбол инфратузилмасини янада ривожлантириш, футбол бўйича спорт мактаблари фаолиятини янги босқичга кўтариш, соҳа мутахассисларини тайёрлаш ва уларни моддий рағбатлантириш тизимини яхшилаш, ўтказилаётган мусобақалар савиясини юксалтириш муҳим масала бўлиб қолмоқда.
BMB Trade Group инвестицион-консалтинг компанияси юртимизда спортни оммалаштириш ва соғлом турмуш тарзини тарғиб қилиш ҳамда соҳага замонавий менежментни жорий қилиш йўналишида муҳим лойиҳаларни амалга оширмоқда.
Ўзбекистон учун яна бир тарихий янгилик. Компания томонидан Италиялик Берлусконилар оиласи билан ҳамкорликда “ORO ROSSO MILANO” бренди таъсис этилди.
Эндиликда BMB Za’faron миллий маҳсулоти дунё бозорида “ORO ROSSO MILANO” бренди номи билан юритилади. Ушбу брендни жаҳонда кенг тарғиб қилиш мақсадида Италиянинг “MILAN” ҳамда “MONZA” футбол клублари билан узоқ муддатли расмий ҳамкорлик шартномалари имзоланди.
Жорий йилда компания томонидан асос солинган “BMB FC” футбол клуби жамоаси биринчи мавсумнинг ўзидаёқ футзал бўйича 1-лига мусобақаларида чемпионликка эришиб, Ўзбекистон олий лигасида иштирок этиш ҳуқуқини қўлга киритди.
Бошланаётган янги мавсумда клуб ўз олдига юксак марраларни қўйган бўлиб, бу учун барча зарурий инфратузилма ва шароитлар яратилиб, жамоа хорижий легионер футзалчилар ва мутахассислар билан кучайтирилди.
Бугунги тадбир доирасида BMB FC жамоасининг расмий тақдимот маросими бўлиб ўтди. Унда вазирлик ва идоралар раҳбарлари, спорт фахрийлари, кенг жамоатчилик ҳамда кўплаб клуб мухлислар иштирок этдилар.
Тақдимот доирасида клубга трансфер қилинган янги футболчи ва хорижий мутахассислар ҳам таништириб ўтилди.
Жамоа ёзги трансфер ойнасида бразилиялик Пауло Энрике Суарес Де Соуза “Паулиньо”, Оливера Де Жесус Соуза Ҳебберт “Болт”, Фернандо Родригез Де Соуза “Фернандиньо” ва бош мураббий маслаҳатчиси Витор Вианналар билан шартномалар имзолади.
