Жорий йилнинг 15-октябрь куни Тошкент шаҳрида Италиянинг Турин политехника университети раҳбарияти ташаббуси ва таклифига кўра, BMB Trade Group компанияси бош директори Мирғулом Усманов мазкур олийгоҳ битирувчиларининг биринчи Форумида иштирок этди.
Форумни университет ректори Жамшид Иноятходжаев кириш сўзи билан очиб, талабалар ўртасидаги алоқаларни мустаҳкамлаш, орттирилган тажрибаларни амалда кенг қўллаш зарурлигини алоҳида таъкидлаб ўтди.
Шунингдек, тадбирда Турин политехника университети раҳбарияти билан бир қаторда чет эллик профессорлар Анита Табакко, Мишель Бонино, Карла Фабиана Кьяссерини ва бошқа фахрий меҳмонлар ҳам сўзга чиқдилар.
Бўлиб ўтган очиқ мулоқот давомида мазкур олийгоҳ битирувчиси М.Усманов ўз ҳаёт йўли, қўлга киритган ютуқларининг сири, Италияда ўтган ўқиш йиллари ҳақида эслаш билан бирга, мамлакатимизнинг йирик тадбиркорлик субъектларидан бири бўлган BMB Trade Group компаниясидаги фаолияти ҳамда италиялик ҳамкорлар билан мамлакатимизда заъфарон маҳсулотини етиштириш, қайта ишлаш ва Европа бозорларига экспорт қилиш бўйича амалга оширилаётган йирик инвестициявий лойиҳа ҳақида сўзлаб берди.
Шуни ҳам айтиш жоизки, олийгоҳнинг кўплаб талабалари BMB Trade Group компаниясига катта қизиқиш билдириб, келажакда у ерда фаолият олиб бориш истаги борлигини таъкидлаб ўтдилар. Ўз навбатида, М.Усманов муваффақиятли амалиёт ўтаган битирувчилар учун компаниянинг эшиклари доимо очиқ эканлигини маълум қилди.
Умуман олганда, мазкур Форум олийгоҳ талабалари учун ҳар томонлама фойдали бўлиб, уларнинг тажриба орттиришлари ҳамда уларни қизиқтирган кўплаб саволларига жавоб олишлари учун имкон яратди.
