BMB HOLDING бу мавсум ҳам Ўзбекистон Профессионал Футбол Лигасининг расмий ҳомийсига айланди
Жорий йилнинг 4 март куни BMB HOLDING бош офисида Ўзбекистон Профессионал футбол лигаси билан ҳомийлик битимини имзолади.
Тадбирда BMB HOLDING Кузатув Кенгаши раиси Бекзод Маматқулов, Профессионал футбол лигаси Бош директори Диёр Имомхўжаев ва қатор оммавий ахборот воситалари вакиллари қатнашдилар.
Б.Маматқулов мамлакатимизда тадбиркорларга яратилаётган имкониятлар, ишбилармонлик муҳитининг самарали йўлга қўйилиши, кенг кўламдаги шарт-шароитлар ҳамда Президентимизнинг тадбиркорларга билдираётган ишончи уларнинг ҳам ижтимоий соҳаларни, хусусан, спортни қўллаб-қувватлашига туркти бўлаётганлигини алоҳида қайд этди. Д. Имомхўжаевнинг таъкидлашича, бундай келишувлар келажакда мамлакатимизда спорт турларини янада ривожланиб, янги босқичга олиб чиқишга хизмат қилади.
Бугунги кунда мамлакатимизда ёшларнинг спортга бўлган қизиқишини ошириш, соғлом турмуш тарзини кенг тарғиб қилиш бўйича кўплаб ислоҳотлар амалга оширилмоқда. Юртимиздаги ушбу ислоҳотларга BMB HOLDING ҳам бефарқ эмас. Мисол учун:
▪️ 2021 йилда BMB PFC футзал клубига асос солинди;
▪️ 2021/22-йилларда «Сўғдиёна» ва «Локомотив» футбол клубларига титул ҳомийлик қилинди;
▪️ 2022 йилда айнан холдинг ҳомийлигида Италия юлдузларидан ташкил топган жамоа Тошкентга ташриф буюриб, Ўзбекистон футболи юлдузларига қарши майдонга тушганди. Бу ўзбек футболининг 110 йиллик юбилейи учун компаниянинг ўзига хос совғаси бўлди, дейиш мумкин.
▪️ 2023 йилда ПФЛ расмий ҳомийси.
▪️ Шунингдек, Компания Ёшлар ишлари агентлиги билан биргаликда иқтидорли ёш шахматчиларимиз Осиё чемпиони Умида Омонова хамда 4 карра жаҳон чемпиони Ҳумоюн Бекмуродовларга бош ҳомий сифатида уларнинг шахмат оламида катта ютуқларни қўлга киритишлари учун барча шарт-шароитларни яратиб бермоқда.
▪️ BMB PFC футзал клубига маҳаллий футзалчилардан ташқари бразилиялик таниқли мураббий ҳамда тажрибали ва иқтидорли футзалчилар ҳам жалб этилган бўлиб, жамоа 2022-2023 йилги мавсумда олтин треблга, яъни, бир мавсумда 3 та мусобақада ғолибликка эришиб, футзал бўйича Ўзбекистон чемпиони, Ўзбекистон Кубоги ва Ўзбекистон Суперкубок эгасига айланди.
▪️Шунингдек, Италиянинг «Милан» ҳамда «Монца» футбол клублари билан ҳам яқин ҳамкорлик алоқалари йўлга қўйилган.
