ЭРОН САФАРИ МУВАФФАҚИЯТЛИ ЯКУНЛАНДИ
Хабарингиз бор, BMB HOLDING вакиллари бир неча кундан буён Теҳрон шаҳрида IRAN EXPO-2024 халқаро саноат кўргазмасида фаол иштирок этмоқда.
Жорий йилнинг 1 май куни мазкур халқаро тадбир доирасида Эрондаги заъфарон етиштириш ва уни қайта ишловчи, қишлоқ хўжалиги маҳсулотларидан чуқур қайта ишланган тайёр маҳсулотлар ишлаб чиқарувчи ҳамда сервис ва консалтинг хизматларини кўрсатувчи компаниялар вакиллари билан учрашувлар бўлиб ўтди.
Маълумки, Эрон заъфарон етиштириш ва ундан турли хил маҳсулотлар ишлаб чиқаришда катта тажрибага эга мамлакатлардан биридир. Айни шу соҳа вакиллари билан бўлиб ўтган суҳбатларда заъфарон қўшилган чой, қаҳва ҳамда қандолат маҳсулотлари ишлаб чиқариш борасида тажриба алмашилди. Шунингдек, заъфарон гулларидан гидролат, эфир мойлари олиш бўйича таклифлар ўртага ташланди.
Бундан ташқари, Эрондаги йирик меҳмонхона ва ресторанлар тармоқларининг асосчилари билан мулоқот давомида қулай сервис хизматларини кўрсатиш, мазкур соҳаларда қилинаётган ҳар битта ишни тизимли ташкил этиш борасида муҳокамалар бўлиб ўтди.
Шунингдек, кўргазма давомида Эрондаги қишлоқ хўжалиги маҳсулотларини чуқур қайта ишлашга ихтисослашган корхоналар вакиллари билан мулоқот давомида бугунги кунда жаҳон бозорларида юқори сифатли мураббо, жем, концентрат нектарлар, паста, пюре каби мева ва сабзавотлардан чуқур қайта ишлаш натижасида тайёрланган маҳсулотларга талабнинг мавжудлиги алоҳида таъкидланди. Томонлар яқин келажакда айни шу йўналишда ҳамкорлик қилиш масалаларини таҳлил қилишди ҳамда фикр алмашишди.
✅Шунинг билан олтинчи Эрон экспорт салоҳияти кўргазмаси ўз ишини якунлади.
