Жорий йилнинг 4 февраль куни Туркиянинг Истанбул шаҳрида BMB HOLDING Кузатув Кенгаши раиси Бекзод Маматқулов ҳамда Польшанинг ARTAGRO компанияси Президенти Брайн Бос ўртасида бизнес нонушта бўлиб ўтди.
Учрашувда ARTAGRO компанияси томонидан ишлаб чиқариладиган, тупроқнинг намлигини сақлаб, сувни тежайдиган гидрогель биологик маҳсулотини ўтган мавсумда Жиззах вилоятининг Бахмал туманида заъфарон экиш жараёнида қўлланилганлиги ҳамда ижобий натижаларга эришилганлиги таъкидлаб ўтилди.
Шу боис, жорий йил Ҳолдинг тизимидаги корхоналарнинг дала майдонларида етиштирилаётган қишлоқ хўжалиги маҳсулотлари, пахта ва мева-сабзавотларини экиш жараёнида ҳам ушбу ижобий тажрибани самарали қўллаш ва гидрогелнинг ҳосилдорликни оширишдаги натижаларини мунтазам таҳлил қилиб боришга келишиб олинди.
Таъкидлаш жоизки, бугунги глобал иқлим ўзгариши, қурғоқчил ҳудудларнинг кенгайиб бориши ҳамда бутун дунёда озиқ-овқат хавфсизлиги ва сув ресурсларининг тақчиллиги муаммоллари ўткир тус олаётган бир даврда мазкур инвестицион лойиҳаларнинг амалга оширилиши ниҳоятда аҳамиятлидир.
Шунингдек, учрашувда Польшанинг йирик савдо тармоқлари ва қишлоқ хўжалиги маҳсулотларини сотиш билан шуғулланадиган компаниялар билан Ҳолдинг ўртасида мустаҳкам алоқа ўрнатиш, Польша бозорларига чуқур қайта ишланган мева-сабзавот маҳсулотларини экспорт қилиш истиқболлари муҳокама қилинди.
Шу билан ўзаро манфаатли ҳамкорлик тамойилларига асосланган ҳамда бир қатор истиқболли лойиҳаларнинг пойдевори қўйилган, BMB HOLDING Кузатув Кенгаши раиси Б. Маматқулов бошчилигидаги делегациянинг Европа мамлакатларига амалга оширган сафари ўз ниҳоясига етди.