Хабарингиз бор пойтахтимизда 28 — 30 апрель кунлари Россия, Марказий Осиёдаги қўшни давлатлар, Хитой, Ҳиндистон ва бошқа мамлакатлардан 10 мингдан ортиқ делегатлар иштирокида «ИННОПРОМ. Марказий Осиё» бешинчи халқаро саноат кўргазмаси бўлиб ўтмоқда.

Мазкур нуфузли тадбир доирасида жорий йилнинг 29 апрель куни BMB HOLDING Бош офисида Ҳолдинг Кузатув Кенгаши раиси Бекзод Маматқулов, мамлакатимизнинг Россия Федерациясидаги Фавқулодда ва Мухтор элчиси Ботиржон Асадов ҳамроҳлигида Россия Федерациясининг “ВЭБ.РФ” Давлат корпорацияси раиси ўринбосари Даниил Алгульян билан учрашув ўтказди.

Учрашув аввалида Д. Алгульян икки мамлакат раҳбарлари ташаббуси билан Жиззах вилоятида замонавий агрологистика мажмуасини ташкил этиш лойиҳаси муваффақиятли ва самарали амалга оширилганини юқори баҳолади. Шунингдек, учрашув давомида лойиҳанинг иккинчи ва учинчи босқичларини молиялаштиришга доир чора-тадбирлар режаси муҳокама қилинди.

Учрашув якунида, агрологистика соҳасидаги алоқаларни мустаҳкамлаш, истиқболли лойиҳаларга “ВЭБ.РФ” маблағларини жалб қилиш масалалари кўриб чиқилиб, ўзаро ҳамкорликни янада ривожлантириш ҳамда бошқа истиқболли лойиҳаларни йўлга қўйишга келишиб олинди.