Жорий йилнинг 25 апрель куни BMB HOLDING Бош офисида Ҳолдинг Бош директорининг халқаро муносабатлар, инвестициялар ва жамоат ташкилотлари билан алоқалар бўйича ўринбосари Хайрулла Набижонов ҳамда Ўмон Султонлигининг ишбилармон доиралари вакиллари билан учрашув бўлиб ўтди.

Учрашув давомида меҳмонларга Ҳолдинг фаолиятининг қамрови, хусусан, заъфарон етиштириш, озиқ-овқат саноати, хизмат кўрсатиш соҳаси, маҳсулотларни чуқур қайта ишлаш, ижтимоий аҳамиятга эга инфратузилма объектларини барпо этиш каби йўналишларда муваффақиятли амалга оширилаётган ҳамда истиқболдаги лойиҳалар ҳақида маълумот берилди.

Ўз навбатида, Ўмон ишбилармон доиралари вакиллари BMB HOLDING томонидан етиштирилаётган табиий ва юқори сифатли заъфарон маҳсулотларига қизиқиш билдирдилар. Ушбу маҳсулотларни келгусида Ўмон Султонлиги бозорига экспорт қилиш имкониятлари юзасидан музокаралар олиб борилди.

Шунингдек, музокаралар чоғида қишлоқ хўжалиги маҳсулотлари экспортини йўлга қўйиш, жумладан, мева-сабзавот ва қуритилган маҳсулотларни етказиб бериш бўйича ҳамкорлик истиқболлари муҳокама қилинди.

Бундан ташқари, Ўмон Султонлиги фуқароларининг Ўзбекистонга ташрифларини ташкил этиш доирасида сайёҳлик хизматларини кўрсатиш ҳамда инфратузилмавий лойиҳаларда ўзаро ҳамкорлик қилиш масалалари юзасидан фикр алмашилди.

Учрашув якунида ўзаро савдо-иқтисодий алоқаларни янада ривожлантириш ҳамда манфаатли ҳамкорликнинг янги йўналишларини белгилаб олишга келишиб олинди.