Европа давлатларига амалга оширилаётган ишчи ташриф доирасида жорий йилнинг 24 октябрь куни Париж шаҳрида Франциянинг Ўзбекистон Республикасидаги элчихонаси кўмагида BMB HOLDING Кузатув кенгаши раиси Бекзод Маматқулов BUSINESS FRANCE Бош директор ўринбосари Мари-Сесиль Тардье билан самарали музокаралар ўтказди.

Икки томон ўз фаолияти ҳақида батафсил тақдимотлар орқали таништиргандан сўнг, музокаралар доирасида қуйидаги долзарб ва истиқболли йўналишларда ҳамкорликни ўрнатиш масалалари муҳокама қилинди:

1. BMB HOLDING ва Франция компаниялари ўртасида тўғридан-тўғри алоқаларни ўрнатиш ҳамда тажриба алмашиш имкониятларини кенгайтириш.
2. Ўзбекистонда ишлаб чиқарилган қишлоқ хўжалиги ва қайта ишланган маҳсулотларни Франция бозорига экспорт қилиш ҳамда логистика тизимини такомиллаштириш.
3. Туризм соҳасида ҳамкорликни ривожлантириш, яъни Франция ва Ўзбекистон ўртасида икки томонлама саёҳат турларини ташкил этиш.
4. Ўзбекистон ҳудудида янги инвестиция лойиҳаларини амалга ошириш.

Маълумот учун BUSINESS FRANCE – Франция компанияларини халқаро бозорларга чиқишида кўмаклашиш ва хорижий инвестицияларни жалб этиш билан шуғулланувчи миллий агентлик бўлиб, у дунё бўйлаб 60 дан ортиқ давлатда жойлашган 150 га яқин офис орқали фаолият юритади. 2022 йилда агентлик 1500 дан ортиқ экспорт лойиҳасини қўллаб-қувватлаган ва 1300 дан ортиқ хорижий инвестиция ташаббусларини амалга оширишга кўмаклашган.

Шунингдек, учрашувда BUSINESS FRANCE учун BMB Za’faron бренди орқали мамлакатимизда етиштирилаётган заъфароннинг халқаро бозорларда ўсиб бораётган нуфузи ҳақида ахборот берилди. Шуни таъкидлаш лозимки, унинг шифобахш хусусиятлари ва экспорт салоҳияти ушбу ташкилот вакилларида катта қизиқиш уйғотди.

Умуман олганда, мазкур учрашув икки мамлакат ўртасидаги иқтисодий ҳамкорликни янада мустаҳкамлаш, янги қўшма ташаббусларни илгари суриш ва Ўзбекистон маҳсулотларини Европа бозорларига кенг миқёсда экспорт қилиш йўлида муҳим қадам бўлди.

BMB HOLDING Ахборот хизмати