Шу кунларда BMB HOLDING Қишлоқ хўжалиги маҳсулотларини етиштиришни ташкил этиш ва корхоналар фаолиятини мониторинг қилиш департаменти директори, қишлоқ хўжалиги бўйича фалсафа фанлари доктори Собир Эгамбердиев ишчи сафар билан Туркиянинг Анталия шаҳрида бўлиб турибди.

Сафардан кўзланган асосий мақсад – Growtech Antalya кўргазмасида иштирок этиб, уруғчиликни ривожлантириш, янги замонавий агротехнологиялар билан танишиш, уларни Ўзбекистонда кенг қўлланадиган усуллар билан таққослаш ҳамда қишлоқ хўжалигида илғор ёндашувларни аниқлашдан иборатдир.

Мазкур тадбирда дунёнинг 135 мамлакатидан 40000 дан ортиқ меҳмонлар иштирок этиши кўзда тутилган.

Дастурга биноан, BMB HOLDING вакили шу йилнинг 18-21 ноябрь кунлари бўлиб ўтадиган Growtech Antalya кўргазмасининг биринчи кунида B2B форматида бир қатор музокаралар ўтказди.

Жумладан, Sunagri компанияси билан юқори сифатли уруғларни ишлаб чиқариш орқали маҳаллий уруғчиликни ривожлантириш ва юртимизнинг турли минтақаларига мослашувчан навларни олиб келиш йўналишида ҳамкорлик истиқболлари муҳокама қилинди. Elevatorsan компанияси билан уруғчиликни қўллаб-қувватлаш учун замонавий ускуналарни мамлакатимизга олиб келиш бўйича музокаралар олиб борилди. Шу билан бирга, Хитойнинг Mewlong компанияси билан ҳам яқин келажакда ҳамкорликни йўлга қўйиш юзасидан мулоқотлар бўлиб ўтди.

Бўлиб ўтган музокаралар сўнгида, барча тарафлар ўзаро маслаҳатлашув ва ҳамкорликни йўлга қўйиш юзасидан мунтазам мулоқотларни давом эттиришга келишиб олдилар.

BMB HOLDING учун ушбу сафар қишлоқ хўжалиги соҳасида халқаро тажриба алмашиш, замонавий илғор технологиялар билан танишган ҳолда уларни юртимизда кенг қўллаш йўлида муҳим қадам бўлиб келмоқда.

BMB HOLDING Ахборот хизмати