BMB HOLDING делегацияси, Бош директорнинг ташқи иқтисодий алоқалар ва инвестициялар бўйича ўринбосари Хайрулла Набижонов раҳбарлигида, Қозоғистон Республикасига амалга оширилаётган экспорт миссияси доирасида Шимкент шаҳридаги GRAMAD RETAIL савдо тармоғи категория бўйича менежери Александр Ельшин билан учрашув ўтказди.

GRAMAD RETAIL — Жанубий Қозоғистонда жадал ривожланаётган йирик чакана савдо тармоқларидан бири ҳисобланади. 2019 йили асос солинган ушбу тармоқ бугунги кунда Шимкент шаҳрида 25 та филиалга эга бўлиб, 20 000 дан ортиқ номдаги маҳсулотларни таклиф этади. Компания кенг ассортимент, юқори сифат ва маҳаллий ишлаб чиқарувчиларни қўллаб-қувватлашга алоҳида эътибор қаратади.

Учрашув чоғида Ҳолдинг вакиллари BMB Zaʼfaron бренди остидаги маҳсулотларни, шунингдек, қайта ишланган ва ҳўл мева-сабзавот маҳсулотларини тақдим этди. GRAMAD RETAIL томони ўзбек маҳсулотларига бўлган талаб юқори эканини таъкидлаб, айниқса заъфарон каби янги маҳсулотлар билан ҳамкорликка катта қизиқиш билдирди.

Томонлар талабгор маҳсулотларни илк етказиб беришларни йўлга қўйиш имкониятларини муҳокама қилди, шунингдек, логистика ва маҳсулот турлари бўйича ҳамкорлик қилиш бўйича келишиб олишди.

Мазкур учрашув Ҳолдинг делегациясининг Қозоғистондаги ритейл компаниялари билан ўтказган музокаралар сериясининг мантиқий давоми бўлди.

Сафар Қозоғистон Республикаси Савдо ва интеграция вазири Арман Шакалиевнинг Тошкентдаги BMB HOLDING бош офисига қилган ташрифи натижасида эришилган келишувлар доирасида амалга оширилди.

Ишчи дастур якунланганидан сўнг, Х.Набижонов бошчилигидаги делегация Ўзбекистонга қайтди ва экспорт кампаниясининг кейинги босқичлари ҳамда янги бозорларда ҳамкорлик йўналишларини шакллантириш устида ишни давом эттирмоқда.

BMB HOLDING Ахборот хизмати