Жорий йилнинг 7 октябрь куни BMB HOLDING Кузатув Кенгаши раиси Бекзод Маматқулов ва Германия Федератив Республикасининг мамлакатимиздаги Фавқулодда ва Мухтор Элчиси Манфред Хутерер ўртасида учрашув бўлиб ўтди.

Мулоқот аввалида Ҳолдинг тизимидаги ташкилотлар томонидан етиштирилган ва чуқур қайта ишланган қишлоқ хўжалиги маҳсулотларининг Германия бозорларига қилинаётган экспорт ҳажми тобора ортиб бораётгани мамнуният билан қайд этилди.

Жумладан, Жиззах далаларида етиштирилиб, чуқур қайта ишланган сабзи ва қуритилган қовоқларнинг ҳамкорлик доирасида Германия бозорларига экспорт қилина бошлангани икки давлат ўртасидаги ташқи иқтисодий алоқаларнинг янада кенгайишига замин яратаётгани алоҳида таъкидлаб ўтилди. Бу эса, ўз навбатида, Ҳолдингнинг экспорт салоҳиятини янада ошириш, миллий иқтисодиётимизга хориждан кам фоизли кредитларни жалб қилиш имкониятини яратади.

Музокаралар давомида томонлар Ҳолдингнинг Германия компаниялари билан амалдаги ҳамкорлигини янада кенгайтириш ҳамда янги истиқболли савдо-иқтисодий алоқаларни йўлга қўйиш масалаларини атрофлича муҳокама қилдилар.

Шунингдек, яқин кунларда Кузатув Кенгаши раиси Бекзод Маматқулов бошчилигидаги делегациянинг Европа, хусусан Германияга режалаштирилган ишчи ташрифини янада самарали ташкил этиш, савдо-иқтисодий ҳамкорлик ва инвестициявий лойиҳаларни йўлга қўйиш мақсадида жаноб Манфред Хутерер Германиянинг йирик компаниялари раҳбарлари билан учрашувлар ташкил этишда кўмаклашишини маълум қилди.

Умуман олганда, бўлиб ўтган учрашув конструктив ва ишчан руҳда ўтиб, эришилган келишувлар Янги Ўзбекистон ва Германия ўртасидаги ҳамкорликни янада ривожлантиришига муносиб ҳисса бўлиб қўшилиши алоҳида таъкидлаб ўтилди.

BMB HOLDING Ахборот хизмати