Жорий йилнинг 16 февраль куни Франциянинг Ўзбекистон Республикасидаги Фавқулодда ва Мухтор элчиси жаноб Уалид Фук Жиззах вилоятига ташрифи давомида BMB HOLDING таркибига кирувчи BMB-NRC Agrologistics ҳамда BMB AGRO PLUS корхоналари фаолияти билан яқиндан танишди.

Холдинг Таъсисчилар кенгаши аъзоси Азиз Маматқулов ҳамда Франция элчиси Уалид Фук иштирокида бўлиб ўтган мулоқот чоғида икки давлат ўртасида агросаноат, қайта ишлаш ва юқори қўшилган қиймат яратадиган ишлаб чиқариш йўналишларида ҳамкорликни кенгайтириш масалалари муҳокама қилинди. Учрашув давомида томонлар бугунги кунда BMB HOLDING корхоналарида халқаро озиқ-овқат хавфсизлиги стандартларига мувофиқ ишлаб чиқариш амалиёти йўлга қўйилгани ва бу ўз навбатида Европа бозорларига, шу жумладан Францияга экспорт ҳажмини ошириш учун мустаҳкам замин яратаётгани мамнуният билан таъкидланди.

Шуни таъкидлаш лозимки, мазкур корхоналарда  жорий этилган замонавий агрологистика тизими, маҳсулотларни саралаш, сақлаш ва халқаро стандартлар асосида қадоқлаш жараёнлари меҳмонда катта қизиқиш уйғотди. Айниқса, халқаро талабларга жавоб берадиган лабораторияси, маҳсулот сифатини назорат қилиш ва экспорт олдидан сертификатлаш тизими юқори мартабали меҳмон томонидан алоҳида эътироф этилди.

Ташриф якунида Уалид Фук Жиззах вилоятида амалга оширилаётган иқтисодий ислоҳотлар, хусусий сектор фаоллиги ва инновацион ёндашувлар юқори салоҳиятга эга эканини қайд этди. У икки давлат ўртасидаги амалий ҳамкорликни янада чуқурлаштириш, янги инвестициявий ташаббусларни қўллаб-қувватлаш ва ишбилармон доиралар ўртасида тўғридан-тўғри алоқаларни мустаҳкамлаш муҳим аҳамият касб этишини таъкидлади.

Умуман олганда, жаноб элчининг мазкур ташрифи Ўзбекистон-Франция ўртасидаги савдо-иқтисодий муносабатларни мустаҳкамлаш, янги қўшма лойиҳаларни амалга ошириш ва замонавий технологиялар трансферини фаоллаштиришда муҳим босқич бўлиб хизмат қилиши кутилмоқда.