Жорий йилнинг 19 февраль куни BMB HOLDING Таъсисчилар кенгаши раиси Бекзод Маматқулов ҳамда Ўзбекистоннинг Хитой Халқ Республикасидаги Фавқулодда ва Мухтор элчиси Фарҳод Арзиев ўртасида учрашув бўлиб ўтди.

Мулоқот аввалида томонлар Ўзбекистон ва Хитой мамлакатлари ўртасидаги ҳамкорлик муносабатлари кундан-кунга ривожланиб, янги босқичга кўтарилиб бораётганини мамнуният билан қайд этдилар. Шу билан бирга, икки давлат ўртасидаги савдо-иқтисодий алоқалар изчил ривожланиб, инвестициявий ҳамкорлик ва қўшма лойиҳаларнинг кўлами тобора кенгайиб бораётгани таъкидланди.

Учрашув давомида Ўзбекистон ва Хитой компаниялари ўртасидаги савдо-иқтисодий ҳамкорликни янада ривожлантириш, товар айирбошлаш ҳажмини ошириш ва қўшма инвестициявий лойиҳалар доирасини кенгайтириш масалалари ҳам атрофлича муҳокама қилинди. Томонлар Хитой компаниялари билан стратегик шерикликни чуқурлаштириш ва қўшма инвестицион лойиҳалар орқали мавжуд ҳамкорликни мустаҳкамлашга алоҳида эътибор қаратдилар.

Самарали ва ишчан руҳда ўтган учрашув якунида томонлар икки давлат ўртасидаги стратегик шерикликни янада ривожлантиришга муносиб ҳисса қўшиш, янги қўшма лойиҳаларни амалга оширишда қўлга киритиладиган натижалардан самарали фойдаланиш ҳамда янги йўналишлар доирасида ўзаро ҳамкорликни янада кенгайтиришга тайёр эканликларини маълум қилдилар.