Қозоғистон Республикаси Ташқи ишлар вазирининг BMB HOLDING номига йўллаган расмий таклифига биноан, жорий йилнинг 22 октябрь куни Чимкент шаҳрида бўлиб ўтган IX Kazakhstan Global Investment Roundtable (KGIR-2026) халқаро инвестиция форумида Холдингнинг Инвестиция лойиҳаларига консалтинг хизмати кўрсатиш департаменти директори Бобир Яхяев иштирок этди.

Дунёнинг 40 дан ортиқ мамлакатидан 500 нафардан зиёд инвесторлар, йирик компаниялар раҳбарлари, молия институтлари ва давлат идоралари вакилларини жамлаган мазкур форум “Барқарорликдан ўсиш сари: Қозоғистоннинг янги инвестиция цикли” мавзусига бағишланди. Анжуман доирасида инвестициявий муҳитни такомиллаштириш, замонавий технологияларни жорий этиш, юқори қўшилган қийматга эга ишлаб чиқаришларни ривожлантириш, рақамли иқтисодиёт ва логистика инфратузилмасини кенгайтириш каби долзарб масалалар муҳокама қилинди.

Форумнинг ишбилармонлик учрашувлари доирасида Бобир Яхяев Tamasuk Holding Company бош ижрочи директори Мэтью Натан, AMSA DIGITAL бош ижрочи директори Амрик Сангха, Sistem Lojistik KZ компаниясининг Қозоғистон бўйича директори ва Қозоғистон-Туркия Ишбилармонлик кенгаши раиси ўринбосари Селами Авджы, Masdar компанияси бош операцион директори, доктор Иброҳим Алмансури, Strarion Advisory компанияси таъсисчиси Андерсон Чуа, Sauran Bricks компанияси директори Махамбет Кайсарбек ҳамда бошқа ишбилармон доиралар вакиллари билан музокаралар олиб борди.

Бўлиб ўтган учрашувлар давомида хорижий ҳамкорларга BMB HOLDINGнинг кўп тармоқли фаолияти, амалга оширилаётган инвестициявий лойиҳалар ва мавжуд ҳамкорлик имкониятлари ҳақида батафсил маълумот берилди. Шунингдек, Ўзбекистоннинг инвестициявий салоҳияти, мамлакатда амалга оширилаётган иқтисодий ислоҳотлар ҳамда турли тармоқларда қўшма лойиҳаларни амалга ошириш истиқболлари юзасидан фикр алмашилди.

Муҳокамалар якунида томонлар ўзаро мулоқотни изчил давом эттириш, ҳамкорликнинг истиқболли йўналишларини атрофлича ўрганиш ва аниқ таклифлар устида ишлашга келишиб олдилар. Шунингдек, хорижий ҳамкорлар Ўзбекистонга ташриф буюриб, BMB HOLDING фаолияти ва мавжуд инвестициявий имкониятлар билан бевосита танишишга таклиф этилди.

Умуман олганда, KGIR-2026 доирасида ўтказилган учрашувлар BMB HOLDINGнинг халқаро ҳамкорлик алоқаларини мустаҳкамлаш, янги инвестициявий ташаббусларни илгари суриш ва ўзаро манфаатли шерикликни амалий босқичга олиб чиқиш йўлидаги муҳим қадам бўлди.