Бахмал тумани ўзига хос иқлими, тоза ҳавоси билан бошқа ҳудудлардан ажралиб туради. Бу ерда тупроқ ҳам, оби-ҳаво ҳам ноёб доривор ўсимликлар етиштириш учун айни муддао. Жумладан, заъфарон учун ҳам Бахмал энг қулай ҳудуд ҳисобланади.

Сўнгги йилларда туманда заъфарон плантациялари тобора кенгайиб бораётганлиги ҳақида аввал хабар берган эдик. Хусусан, жорий йилда бу майдонлар 700 гектардан 820 гектарга етказилди.

Айни пайтда бу ерда заъфарон гуллари очилиб, кенг майдонлар кўзни қувонтирар даражага келди. Бахмаллик меҳнаткашлар ҳар куни далаларга чиқиб, дастлабки терим ишларини бошлаб юборишди.

Ҳали олдинда кенг қамровли терим мавсуми турибди.

Теримчиларнинг дастлабки фаолиятидан шуни англаш мумкинки, бу йилги ҳосил ҳам сифат, ҳам миқдор жиҳатдан анча яхши.

Терим жараёнида маҳаллий ишчи кучи учун ҳам қўшимча имкониятлар яратилади, бу эса аҳоли бандлигига ижобий таъсир кўрсатади.