BMB GARDENS томонидан Ғаллаорол туманида амалга оширилаётган лойиҳа доирасида интенсив боғ барпо этишга алоҳида эътибор қаратилган бўлиб, бу – ҳудудда замонавий боғдорчиликни янги босқичга олиб чиқишга хизмат қилади.

Айни пайтда янги боғ ҳудудида тайёргарлик ва қурилиш ишлари тизимли равишда олиб борилмоқда. Жумладан, сув таъминотини яхшилаш мақсадида ҳовуз барпо этилди ҳамда янги қудуқлар қазиш ишлари амалга оширилмоқда.

Мутахассислар томонидан барча ишлар техник талаблар асосида олиб борилаётгани ер майдонларини самарали суғориш имкониятини кенгайтиради.

Мазкур ҳудудда сувни тежаш мақсадида томчилатиб суғориш технологиялари жорий қилиниб, инвитро усулида етиштирилган гилос кўчатларини экиш режалаштирилган.

Интенсив боғ усули сув ва ер ресурсларидан оқилона фойдаланиш, қисқа муддатда юқори ҳосилдорликка эришиш ҳамда маҳсулот сифатини оширишда муҳим аҳамият касб этади. Бу эса нафақат ишлаб чиқариш қувватларини кенгайтириш, балки экспорт салоҳиятини ошириш имконини ҳам беради.

Шу билан бирга, корхона ҳудудида маъмурий офис биноси, ходимлар учун ошхона, қишлоқ хўжалиги техникаларини сақлаш учун махсус жойлар ва бошқа инфратузилма объектлари қурилмоқда. Янги бинолар ишчи-хизматчилар учун замонавий ва қулай меҳнат шароитларини яратишга хизмат қилади.

Изчил давом этаётган бунёдкорлик ишлари корхонанинг узоқ муддатли ривожланиш стратегияси асосида фаолият юритаётганини кўрсатади.

Яқин келажакда барпо этилаётган объектлар ишга туширилиши натижасида интенсив боғдорчилик йўналишида юқори ҳосилдорликка эришиш, янги иш ўринлари яратиш ва ҳудуд иқтисодий салоҳиятини янада мустаҳкамлаш кутилмоқда.