Жорий йилнинг 2 март куни Испания Қироллиги пойтахти Мадрид шаҳрида жойлашган Mandarin Oriental Ritz мажмуасида Ўзбекистон – Испания бизнес-форуми бўлиб ўтди.

Бизнес-форумдан кўзланган асосий мақсад – Ўзбекистон ва Испания ўртасида савдо-иқтисодий алоқаларни янада кенгайтириш, инвестициявий ҳамкорликни мустаҳкамлаш, истиқболли лойиҳаларни амалга ошириш имкониятларини муҳокама қилиш ҳамда икки мамлакат ишбилармон доиралари ўртасида тўғридан-тўғри мулоқот майдонини яратишдан иборат бўлди.

Форумда иштирок этган BMB HOLDING ташқи иқтисодий алоқалар департаменти директори Анвар Муминов томонидан тадбир иштирокчиларига Холдинг фаолияти, унинг инвестициявий салоҳияти, бугунги кунда амалга оширилаётган истиқболли лойиҳалари ҳақида атрофлича маълумот берилди ва тақдимот видеоролиги намойиш этилди.

Шунингдек, ташкилотчилар томонидан иштирокчилар учун B2B форматида музокаралар ўтказиш учун қулай платформа яратилди. Жумладан, Анвар Муминов ҳамда Avateco компанияси раҳбари Алехандро Пастрана, шунингдек, Poza ва Hidráulicas компаниялари вакили Хесус Поза Мампел ўртасида музокаралар ўтказилиб, ўзаро манфаатли ҳамкорлик истиқболлари муҳокама қилинди.

Умуман олганда, мазкур бизнес-форум икки мамлакат ўртасидаги савдо-иқтисодий муносабатларни янада ривожлантиришга, янги инвестициявий лойиҳаларни амалга ошириш ҳамда компаниялар ўртасида узоқ муддатли ва самарали ҳамкорликни йўлга қўйишга хизмат қилиши кутилмоқда.