Жорий йилнинг 3 август куни Ҳиндистон пойтахти Нью-Деҳли шаҳрида Ўзбекистон Республикаси Инвестициялар, саноат ва савдо вазирлиги ҳамда Ҳиндистон Савдо ва саноат вазирлиги ҳузуридаги Савдо департаменти ташаббуси билан икки мамлакат ўртасидаги савдо-иқтисодий алоқаларни янада кенгайтириш, инвестициявий ҳамкорликни ривожлантириш ҳамда ишбилармон доиралар ўртасидаги тўғридан-тўғри мулоқотни фаоллаштиришга бағишланган бизнес-форум бўлиб ўтди.
 
Давлат идоралари, инвестиция институтлари, тармоқ уюшмалари ва етакчи компанияларнинг 200 нафардан ортиқ вакиллари иштирок этган мазкур халқаро анжуманда BMB HOLDING Ташқи иқтисодий алоқалар департаменти директори Бобир Яхяев қатнашди.
 
Таъкидланганидек, сўнгги йилларда Ўзбекистон ва Ҳиндистон ўртасидаги иқтисодий ҳамкорлик изчил ривожланиб, савдо-иқтисодий алоқаларни кенгайтириш, инвестицияларни жалб қилиш ҳамда хусусий сектор ўртасидаги амалий ҳамкорликни фаоллаштириш устувор йўналишлардан бирига айланмоқда. Шу нуқтаи назардан, мазкур бизнес-форум янги ишбилармонлик алоқаларини йўлга қўйиш учун муҳим мулоқот майдони бўлиб хизмат қилди.
 
Форум давомида Б. Яхяев BMB HOLDINGнинг экспорт ва инвестиция салоҳияти, юқори қўшилган қийматли маҳсулотлар ишлаб чиқаришга қаратилган лойиҳалари, халқаро бозорлардаги фаолияти ҳамда хорижий ҳамкорлар билан узоқ муддатли шерикликни ривожлантириш бўйича амалга оширилаётган ишлар юзасидан тақдимот ўтказди.
 
Шунингдек, Active Services, Mega Grain Trading Co., Axis Group, Royal Consultants, Radscan Systems, The Great Eastern Shipping Company, Nortech Trinity India, Nirman Consultants ҳамда Amby Consultancy Services компаниялари раҳбарлари билан B2B форматда музокаралар ҳам ўтказилди. Учрашувларда қўшма инвестиция ташаббусларини амалга ошириш, экспорт ҳамкорлигини кенгайтириш, замонавий технологияларни жалб қилиш ҳамда истиқболли йўналишлар бўйича узоқ муддатли шериклик муносабатларини йўлга қўйиш масалалари атрофлича муҳокама қилинди.
 
Ҳиндистон-Ўзбекистон бизнес-форуми доирасида бўлиб ўтган бошқа учрашув ва тадбирлар ҳақида кейинги хабарларимизда маълумот бериб борамиз.