Шу йилнинг 3–6 май кунлари АҚШда нуфузли SelectUSA инвестиция саммити бўлиб ўтаётгани ҳақида аввалроқ хабар берган эдик. Дунёнинг турли давлатларидан кўплаб компаниялар ва инвесторларни бир майдонга жамлаган ушбу форум доирасида 5 май куни BMB HOLDING Таъсисчилар кенгаши раиси Бекзод Маматқулов Америка Қўшма Штатларининг ишбилармон доиралари вакиллари билан бир қатор самарали учрашувларни ўтказди.

Хусусан, Export-Import Bank of the United States, World Trade Center San Diego, шунингдек, Калифорния штатидаги қатор шаҳар ва ҳудудий иқтисодий ривожланиш тузилмалари, жумладан City of Santa Rosa, Fairfield Economic Development, Moreno Valley Economic Development, City of Bakersfield, City of Ontario Economic Development Agency, Fresno County Economic Development Corporation, County of Humboldt, City of Rancho Cucamonga ҳамда City of Riverside Economic Development раҳбарлари билан B2B форматда музокаралар бўлиб ўтди.

Музокаралар давомида инвестиция ва савдо-иқтисодий йўналишларда ҳамкорликни ривожлантириш, қўшма лойиҳаларни амалга ошириш, “Made in Uzbekistan” бренди остидаги маҳсулотларни АҚШ бозорларида тарғиб қилиш, шунингдек, икки мамлакат ишбилармонлари ўртасидаги ҳамкорлик алоқаларини мустаҳкамлаш билан боғлиқ бўлган масалалар муҳокама қилинди.

Шунингдек, саноат, логистика, инфратузилма ва экспортни қўллаб-қувватлаш соҳаларида ҳамкорликни кенгайтириш, Америка бозорига чиқиш имкониятларининг амалий механизмлари муҳокама қилиниб, томонлар ўзаро манфаатли ҳамкорликни йўлга қўйиш бўйича келишувга эришдилар.

Халқаро инвестиция саммити доирасида бўлиб ўтган мазкур музокаралар BMB HOLDING’нинг халқаро майдондаги фаоллигини янада мустаҳкамлаш, мамлакатимизга янги инвестицияларни жалб этиш ҳамда глобал бизнес ҳамжамияти билан узоқ муддатли ҳамкорлик алоқаларини кенгайтиришга хизмат қилади.

Саммит доирасида бўлиб ўтадиган бошқа тадбирлар ҳақида қўшимча яна хабар бериб борамиз.