Жорий йилнинг 3–6 май кунлари Самарқанд шаҳрида Осиё тараққиёт банки Бошқарувчилар кенгашининг 59-йиллик йиғилиши бўлиб ўтди. Унда 3 мингдан ортиқ иштирокчи – банк, халқаро молия институтлари ва нуфузли делегациялар вакиллари қатнашди.

Йиғилишда Ўзбекистон ва Марказий Осиёни йирик иқтисодий ва логистика марказига айлантириш истиқболлари, инвестицияларни жалб этиш, инфратузилмани ривожлантириш, ишбилармонлик муҳитини яхшилаш каби қатор масалалар муҳокама қилинди. Шунингдек, халқаро ҳамкорликни кенгайтириш, савдо йўлакларини ривожлантириш, экспорт-импорт салоҳиятини ошириш устувор йўналишлар сифатида белгиланди.

Анжуман доирасида хусусий секторни қўллаб-қувватлаш, кичик ва ўрта бизнесни ривожлантириш, шунингдек, барқарор ривожланиш ва “яшил иқтисодиёт”га ўтиш масалаларига алоҳида эътибор қаратилди.

Саммит B2B шаклидаги музокаралар ва амалий учрашувлар форматида ҳам давом этди. Унда Холдинг вакиллари ОТБнинг қатор мутасаддилари ва бошқа молия институтлари вакиллари билан учрашиб, Холдингнинг янги лойиҳалари тақдимотини ўтказдилар. Томонлар келгусида зарурий инвестицияларни жалб қилиш, ишбилармонлик келишувларини тузиш ва узоқ муддатли халқаро ҳамкорликни ривожлантириш масалаларини атрофлича муҳокама қилдилар.