Сўнгги йилларда Ўзбекистон ва Ҳиндистон ўртасидаги савдо-иқтисодий ҳамкорлик тобора янги амалий мазмун билан бойиб бормоқда. Айниқса, икки мамлакат ишбилармон доиралари ўртасида йўлга қўйилаётган тўғридан-тўғри мулоқотлар янги экспорт йўналишларини шакллантириш учун муҳим замин яратаётгани қувонарли ҳолдир.

Шу нуқтаи назардан, жорий йилнинг 19 август куни BMB HOLDING Ташқи иқтисодий алоқалар департаменти директори Бобир Яхяев Ҳиндистоннинг агросаноат йўналишида фаолият юритувчи Bhavesh Trading Company асосчиси Сунил Карара билан учрашди.

1965 йилдан буён агросавдо соҳасида фаолият юритиб келаётган Bhavesh Trading Company уч авлодлик тажрибага эга бўлиб, компания маълумотларига кўра, 18 дан ортиқ мамлакат ва 4 қитъани қамраб олган агросавдо тармоғига эга. Компания янги мева-сабзавот ва зираворларни импорт-экспорт қилишга ихтисослашган.

Бугунги мулоқот 3-4 август кунлари Нью-Деҳли шаҳрида бўлиб ўтган Ўзбекистон-Ҳиндистон бизнес-форуми ва унинг доирасидаги B2B музокараларнинг мантиқий давоми бўлди. Ўша учрашувларда BMB HOLDING ва Ҳиндистон ишбилармон доиралари вакиллари ўртасида янги савдо йўналишлари ҳамда экспорт имкониятлари юзасидан фикр алмашилган эди.

Тошкентдаги навбатдаги мулоқотда BMB HOLDING томонидан етиштирилаётган ва қайта ишланаётган саримсоқ маҳсулотларини Ҳиндистон бозорига йирик ҳажмда етказиб бериш масаласига алоҳида эътибор қаратилди. Томонлар маҳсулот сифати ва ҳажми, қадоқлаш, сақлаш ҳамда логистика талабларини атрофлича муҳокама қилдилар.

Музокараларнинг муҳим натижаларидан бири – ҳиндистонлик ҳамкорнинг BMB HOLDINGнинг Жиззах вилоятидаги ишлаб чиқариш қувватларига ташриф буюриш истаги бўлди. Ташриф давомида қишлоқ хўжалиги маҳсулотлари, хусусан, саримсоқ етиштириш, сақлаш ва қайта ишлаш жараёнлари билан бевосита танишиш, маҳсулотларни жойида баҳолаш ҳамда эҳтимолий етказиб бериш ҳажмларини белгилаш режалаштирилмоқда.

Бу жараён BMB HOLDING учун оддий B2B мулоқотдан аниқ экспорт имкониятига ўтишнинг навбатдаги босқичини англатади.

Айни пайтда Ўзбекистон-Ҳиндистон савдо-иқтисодий алоқалари ҳам жадал ривожланмоқда. 2025 йил якунига кўра, икки мамлакат ўртасидаги товар айирбошлаш ҳажми 30 фоизга ошиб, 1,3 миллиард доллардан ошди. 2026 йилда ушбу кўрсаткични 2 миллиард долларга етказиш мақсади белгиланган. Бугунги кунда Ҳиндистон капитали иштирокида Ўзбекистонда қарийб 400 та корхона фаолият юритмоқда, қўшма лойиҳалар портфели эса 5 миллиард доллардан ошган.

BMB HOLDING учун эса мазкур ҳамкорлик янги бозорларга чиқиш, маҳаллий аграр маҳсулотларни юқори талабга эга хорижий бозорларга етказиб бериш ва экспорт географиясини кенгайтириш йўлидаги муҳим қадамлардан биридир.

Кейинги босқич – Жиззахдаги ишлаб чиқариш қувватларини жойида ўрганиш, маҳсулотнинг экспорт салоҳиятини баҳолаш ҳамда етказиб бериш ҳажми, графиги ва тижорий шартларни келишиб олиш.

Шу тариқа, Нью-Деҳлида бошланган B2B мулоқот Тошкентдаги музокаралар орқали Жиззахдаги амалий ҳамкорлик босқичига ўтмоқда.