Жорий йилнинг 26 август куни BMB HOLDING Ташқи иқтисодий алоқалар департаменти директори Бобир Яхяев ва Хитойнинг Xinjiang Shangkun Hesheng International Trade Co., Ltd компанияси ижрочи директори Ци Цзитянь ўртасида учрашув бўлиб ўтди.
 
Мулоқот давомида Ўзбекистон ва Хитой ўртасидаги савдо-иқтисодий алоқаларни янги амалий лойиҳалар билан кенгайтириш, маҳаллий маҳсулотларни Хитой бозорига олиб чиқиш ҳамда истиқболли экспорт йўналишларини шакллантириш масалаларига эътибор қаратилди.
 
Хитой томонига BMB HOLDINGнинг инвестициявий, консалтинг ва ташқи иқтисодий фаолият соҳаларидаги салоҳияти, хорижий инвесторлар билан ишлаш тажрибаси, экспорт-импорт операцияларини қўллаб-қувватлаш ва инвестиция лойиҳаларини амалга ошириш имкониятлари тақдим этилди.
 
Учрашувнинг асосий мавзуларидан бири Ўзбекистонда ишлаб чиқарилаётган олтингугуртни Хитой бозорига экспорт қилиш истиқболлари бўлди. Мазкур йўналишда икки мамлакат ўртасида савдо алоқалари аллақачон шаклланган. Хусусан, 2024 йилда Ўзбекистондан 111,9 минг тонна тозаланмаган олтингугурт экспорт қилиниб, унинг умумий қиймати 3,47 млн АҚШ долларини ташкил этган. Шу даврда Хитой Ўзбекистондан 688,8 тонна олтингугурт импорт қилган.
 
Шу билан бирга, ҳамкорликни фақат хом ашё экспорти билан чеклаб қолмасдан, истиқболда олтингугуртни қайта ишлаш, сульфат кислота ва бошқа юқори қўшилган қийматга эга кимё маҳсулотларини ишлаб чиқариш бўйича саноат кооперациясини йўлга қўйиш имкониятлари ҳам муҳокама қилинди.
 
Мазкур ташаббус Ўзбекистон маҳсулотларининг Хитой бозоридаги иштирокини кенгайтириш, экспорт йўналишларини диверсификация қилиш ва хом ашёни қайта ишлашга асосланган янги саноат кооперацияси учун замин яратади.