Жорий йилнинг 8 октябрь куни BMB HOLDING Бош директори ўринбосари Хайрулла Набижонов Хитойнинг AI Automotive Group компанияси раиси Хун Шивэн билан учрашув ўтказди.
 
Учрашувда автомобиль савдоси ва сервис хизматларини ривожлантириш, замонавий транспорт ечимларини жорий этиш ҳамда инвестициявий ҳамкорликни кенгайтириш масалалари муҳокама қилинди. Шунингдек, Ўзбекистонда такси хизматларини ташкил этиш, сервис марказларини йўлга қўйиш ва халқаро лойиҳалар бўйича консалтинг хизматларини ривожлантириш имкониятларига алоҳида эътибор қаратилди.
 
Томонлар автомобиль саноатидаги мавжуд ҳамкорлик салоҳиятини инобатга олган ҳолда, савдо ва техник хизмат кўрсатиш соҳаларида ўзаро алоқаларни кенгайтириш истиқболларини муҳокама қилдилар. Суҳбат давомида транспорт воситалари паркини самарали бошқариш, сервис инфратузилмасини такомиллаштириш ҳамда мижозларга хизмат кўрсатиш сифатини ошириш масалалари диққат марказида бўлди.
 
Шунингдек, экологик тоза транспорт воситаларидан фойдаланиш кўламини кенгайтириш, хусусан, электр автомобиллари асосида такси хизматларини ташкил этиш имкониятлари муҳокама қилинди. Мазкур йўналиш замонавий транспорт хизматларини ривожлантириш ва бозор талабларига мос ечимларни жорий этиш нуқтаи назаридан муҳим аҳамият касб этади.
 
Учрашув давомида истиқболли инвестициявий лойиҳаларни аниқлаш, уларнинг иқтисодий самарадорлигини баҳолаш ва хорижий ҳамкорлар билан амалий ҳамкорлик механизмларини ишлаб чиқиш масалалари ҳам кўриб чиқилди.
 
Музокаралар якунида автомобиль савдоси, сервис хизматлари, замонавий транспорт ечимлари ва инвестициявий консалтинг соҳаларидаги ҳамкорлик имкониятларини атрофлича ўрганиш, шунингдек, истиқболли ташаббусларни амалий лойиҳаларга айлантириш мақсадида мулоқотни давом эттириш муҳимлиги таъкидланди.