Жорий йилнинг 12 октябрь куни BMB HOLDING Бош директори ўринбосари Хайрулла Набижонов ва Беларусь Республикасининг “Экобелтехнология БелОИ” унитар корхонасининг хом-ашё харидлари бўйича директор ўринбосари Елена Ершова ўртасида учрашув бўлиб ўтди.
 
Мулоқот аввалида меҳмонга BMB HOLDINGнинг кўп тармоқли фаолияти, ишлаб чиқариш қувватлари, амалга оширилаётган лойиҳалари ҳамда экспорт салоҳияти ҳақида батафсил маълумот берилди.
 
Учрашувда асосий эътибор Холдинг маҳсулотларини Беларусь бозорига етказиб бериш имкониятларини ўрганиш, тадбиркорлар билан ишбилармонлик алоқаларини йўлга қўйиш ва экспорт ҳамкорлигини амалий жиҳатдан ривожлантириш масалаларига қаратилди. Шунингдек, Беларусь бозорининг талаб ва хусусиятларини инобатга олган ҳолда маҳсулот турлари, нархлар ҳамда етказиб бериш шартларини қамраб олган махсус тижорат таклифини тайёрлаш юзасидан фикр алмашилди.
 
Ўзбекистон ва Беларусь ўртасидаги иқтисодий ҳамкорликни кенгайтириш икки давлат ўртасидаги стратегик шерикликнинг муҳим йўналишларидан бири ҳисобланади. Хусусан, шу йилнинг 9 июль куни бўлиб ўтган олий даражадаги музокаралар якунида стратегик шериклик тўғрисидаги декларация имзоланиб, 2026–2030 йилларга мўлжалланган ҳамкорлик режаси қабул қилинганди. Ушбу ҳужжатларда ўзаро товар айирбошлаш ҳажмини 2 миллиард АҚШ долларига етказиш мақсади ҳам белгиланган.
 
Мазкур вазифаларни амалга оширишда маҳаллий ишлаб чиқарувчиларнинг Беларусь бозоридаги иштирокини кенгайтириш, янги савдо алоқаларини йўлга қўйиш ва миллий маҳсулотларнинг экспорт ҳажмини ошириш муҳим аҳамият касб этади.
 
Таъкидлаш жоизки, BMB HOLDINGнинг Беларусь йўналишидаги ҳамкорлиги изчил ривожланмоқда. Жумладан, жорий йилнинг 18 сентябрь куни Холдинг Таъсисчилар кенгаши раиси Бекзод Маматқуловнинг Беларусь Республикасининг Ўзбекистондаги Фавқулодда ва Мухтор Элчиси Александр Огородников билан учрашуви бўлиб ўтган эди. Унда икки томонлама иқтисодий алоқаларни кенгайтириш ва ўзаро манфаатли ҳамкорликни ривожлантириш масалалари муҳокама қилинган.
 
Бўлиб ўтган мазкур учрашув мулоқотларнинг мантиқий давоми сифатида Холдинг маҳсулотларини Беларусь бозорига олиб чиқиш, янги харидорлар билан алоқаларни йўлга қўйиш ва экспорт имкониятларини амалий жиҳатдан ўрганишга қаратилгани билан аҳамиятли бўлди.
 
Бир сўз билан айтганда, BMB HOLDING халқаро ҳамкорлик алоқаларини мустаҳкамлаш, маҳаллий маҳсулотларнинг ташқи бозорлардаги иштирокини кенгайтириш ва янги савдо йўналишларини ривожлантириш борасидаги фаолиятини изчил давом эттирмоқда.