Жорий йилнинг 21 ноябрь куни BMB HOLDING Кузатув кенгаши раиси Бекзод Маматқулов Польша Республикасининг Ўзбекистондаги муваққат ишлар бўйича вакили Мариан Пшездецкий билан учрашув ўтказди.

Учрашув аввалида Польшанинг дипломатик ваколатхонаси раҳбарига Ҳолдинг асосий фаолият йўналишлари ҳамда амалга оширилаётган лойиҳалар ҳақида батафсил маълумот берилди.

Сўнг, қишлоқ хўжалиги соҳаси учун муҳим бўлган ва бугунги кунда Польшада ишлаб чиқарилаётган гидрогель технологиясини маҳаллий ишлаб чиқарувчилар томонидан қўллаш имкониятлари масалалари ҳам муҳокама қилиниб, ушбу маҳсулотнинг афзалликлари иштирокчилар томонидан эътироф этилди.

Ўз навбатида, жаноб Пшездецкий Ўзбекистон ва Польша давлатлари ўртасида қишлоқ хўжалиги соҳасида улкан ҳамкорлик салоҳияти мавжудлигини таъкидлади.

Жорий йилнинг 26-28 ноябрь кунлари Польша қишлоқ хўжалиги вазири бошчилигидаги делегациянинг Ўзбекистонга ташриф буюриши кутилаётганини маълум қилиб, ушбу ташриф доирасида делегациянинг BMB HOLDING фаолияти билан танишиш масаласини ҳам дастурга киритиш таклифини илгари сурди.

Шу билан бирга, томонлар ўзаро савдо-иқтисодий алоқаларни кенгайтириш борасида ҳам катта имкониятлар мавжудлигини қайд этишди.

Шунингдек, учрашув сўнгида юқори мартабали меҳмон Польша ва Ўзбекистон ўртасидаги дўстона муносабатларни янада мустаҳкамлаш мақсадида футбол бўйича ўртоқлик учрашувларини ташкил этишда кўмаклашишини ҳам маълум қилди.

BMB HOLDING Ахборот хизмати