Куни кеча BMB HOLDING Бош директори ўринбосари Хайрулла Набижонов BYD GROUPнинг Марказий Осиё бўйича регионал бошқарув директори Иван Цао, BYD Factory Uzbekistan директори ўринбосари Морган Ин ҳамда BYD Central Asia бизнесни ривожлантириш директори Юсуф Ма билан учрашди.

Мулоқотда Ўзбекистонда замонавий саноатни ривожлантириш, юқори технологияларни жалб этиш, инвестициявий салоҳиятдан самарали фойдаланиш ва саноат кооперациясини кенгайтириш масалалари муҳокама қилинди.

Хитойлик ҳамкорларга BMB HOLDINGнинг кўп тармоқли фаолияти, амалга оширилаётган инвестициявий лойиҳалари, ишлаб чиқариш қувватлари ва истиқболли бизнес ташаббуслари ҳақида маълумот берилди.

Учрашувда автомобиль саноати, янги энергияли транспорт воситалари, замонавий технологиялар ҳамда саноат кооперациясини ривожлантиришга қаратилган истиқболли йўналишлар кўриб чиқилди. Томонлар инвестициявий ва саноат лойиҳалари доирасида амалий ҳамкорликни кенгайтириш, ўзаро манфаатли ташаббусларни биргаликда ишлаб чиқиш ва амалга оширишга келишиб олдилар.

Маълумки, BYDнинг Ўзбекистондаги ишлаб чиқариш кўлами изчил ошиб бормоқда. 2024 йилда 4 мингдан ортиқ, 2025 йилда эса 20 мингдан зиёд автомобиль ишлаб чиқарилган. 2026 йилнинг биринчи ярмида BYD Uzbekistan томонидан 17 мингдан ортиқ автомобиль сотуви амалга оширилган.

Мулоқотда Ўзбекистонда ишлаб чиқарилаётган BYD автомобилларини Марказий Осиё ва бошқа ташқи бозорларга экспорт қилиш, электр автобуслар ишлаб чиқариш, инженерлик-сервис марказларини ташкил этиш ҳамда “яшил” транспорт соҳасида инновацион ечимларни жорий этиш масалаларига алоҳида эътибор қаратилди.

Шунингдек, BYD GROUPнинг Марказий Осиё бўйича регионал бошқарув директори Иван Цаонинг Ўзбекистон ва BYD ўртасидаги ҳамкорликни ривожлантиришга қўшган ҳиссаси алоҳида эътироф этилди. У Ўзбекистон Республикасининг “Дўстлик” ордени билан тақдирлангани қайд этилди.

Учрашув якунида BMB HOLDING ва BYD Central Asia ўртасида саноат, инвестиция ва юқори технологиялар соҳаларида ўзаро манфаатли ҳамкорликни янада ривожлантириш, янги лойиҳаларни амалга ошириш учун муҳим асос яратилгани таъкидланди.