​Жорий йилнинг 10 ноябрь куни BMB HOLDING Таъсисчилар кенгаши раиси Бекзод Маматқулов ҳамда Европанинг етакчи компанияларидан бири Operail (Эстония) таъсисчиси Ричард Томингас ўртасида учрашув бўлиб ўтди.

​Маълумот учун, Operail компанияси темир йўл орқали юк ташиш, ҳаракат таркибига техник хизмат кўрсатиш ва уни таъмирлаш йўналишларида фаолият юритади. 

​Мулоқот давомида асосий эътибор савдо-иқтисодий ҳамкорликни ривожлантириш, хусусан, Ўзбекистон ва Эстония ўртасидаги экспорт-импорт операцияларини кенгайтириш масалаларига қаратилди.

​Мазкур йўналишда BMB HOLDING тизимида ишлаб чиқарилаётган қишлоқ хўжалиги хомашёсини чуқур қайта ишлаш асосида тайёрланган маҳсулотларни Эстония бозорига етказиб бериш имкониятлари муҳокама қилинди. 

Шу билан бирга, эстониялик ҳамкорларнинг мавжуд ишбилармонлик алоқалари ва савдо тармоқларидан фойдаланган ҳолда ўзбек маҳсулотларини Европанинг бошқа давлатлари, жумладан, Норвегия, Швеция ва Финляндия бозорларига чиқариш йўллари кўриб чиқилди.

​Бундан ташқари, музокаралар доирасида сармоявий шериклик масалаларига ҳам алоҳида эътибор қаратилиб, янги қўшма лойиҳаларни молиялаштириш ва амалга ошириш механизмлари юзасидан фикр алмашилди.

​Мазкур учрашув томонлар ўртасида ўзаро манфаатли ишбилармонлик алоқаларини ривожлантириш ҳамда келажакдаги устувор йўналишларни белгилаб олиш борасида муҳим мулоқот майдони бўлди.