Жорий йилнинг 29 апрель куни BMB HOLDING Бош офисида Қозоғистон Республикасининг Қизилорда вилояти ҳокими ўринбосари Зебешев Ардак Темирханович ва Туркистон вилояти ҳокими ўринбосари Козбеков Талгат Жапарханович бошчилигидаги делегация вакиллари билан учрашув бўлиб ўтди.

Учрашувда икки қўшни мамлакат — Ўзбекистон ва Қозоғистон ўртасидаги анъанавий дўстона муносабатлар ва ўзаро ишончга асосланган ҳамкорлик алоқалари сўнгги йилларда янада ривожланаётганлиги қайд этилди. Томонлар савдо-иқтисодий, транспорт-логистика ва инвестиция соҳаларида ўзаро ҳамкорликни чуқурлаштириш масалалари юзасидан фикр алмашдилар.

Асосий эътибор қишлоқ хўжалиги соҳасидаги ҳамкорлик истиқболларига қаратилди. Хусусан, Ҳолдинг томонидан етиштирилаётган экспортбоп қишлоқ хўжалиги маҳсулотларини Қозоғистон бозорига етказиб бериш ҳажмини ошириш ҳамда мазкур маҳсулотларни дистрибуция қилиш бўйича ҳамкорлик масалалари муҳокама қилинди.

Қозоғистон томони ўз навбатида, минтақалараро алоқаларни мустаҳкамлаш, агросаноат соҳасида қўшма корхоналар ташкил этиш, логистика инфратузилмасини ривожлантириш ва икки томонлама товар айирбошлашни диверсификация қилишга катта қизиқиш билдирди.

Учрашув якунида савдо миссиялари алмашинувини йўлга қўйиш ва товар айрибошлаш ҳажмини янада оширишга келишиб олинди.