Жорий йилнинг 7 май куни Тошкент шаҳрида Ўзбекистон Республикаси Инвестициялар, саноат ва савдо вазирлиги ҳамда Австрия элчихонаси ҳамкорлигида Ўзбекистон–Австрия бизнес-форуми бўлиб ўтди.

Форумда икки мамлакатнинг 100 нафардан ортиқ ишбилармон доиралари, йирик компаниялар, давлат ташкилотлари ва молиявий институтлари вакиллари иштирок этди. Тадбир Ўзбекистон ва Австрия ўртасидаги савдо-иқтисодий, инвестициявий ҳамда технологик ҳамкорликни янги босқичга олиб чиқишга хизмат қилувчи муҳим мулоқот майдонига айланди.

Бўлиб ўтган тадбирда BMB HOLDING халқаро муносабатлар департаменти директори Анвар Муминов ҳам иштирок этиб, Австриянинг қатор етакчи компаниялари вакиллари билан музокаралар ўтказди.

Жумладан, Austrian Technology Corporation компанияси бош директори Кристиан Тино билан учрашувда икки томонлама ҳамкорликни кенгайтириш, инновацион ечимлар ва замонавий технологияларни жорий этиш, шунингдек, қишлоқ хўжалиги соҳасида қўшма лойиҳаларни амалга ошириш масалалари муҳокама қилинди.

Учрашув чоғида австриялик тадбиркор Ўзбекистонда қишлоқ хўжалиги соҳасида фаолият юритаётган компаниялар билан ҳамкорлик ўрнатишга қизиқиш билдириб, ушбу йўналишда амалий шерикликни йўлга қўйишга тайёр эканини маълум қилди.