Аввал хабар берганимиздек, жорий йилнинг 14 июль куни BMB HOLDING офисида Хитой компаниялари вакиллари билан қатор учрашувлар ўтказилди. Улардан навбатдагисида BMB HOLDING Ташқи иқтисодий алоқалар департаменти директори Бобир Яхяев Huaxia Group компанияси директори Ли Цюан, компаниянинг Ўзбекистондаги филиали бош менежери Лю Юйцяо, Shandong Jinhui Fire Protection Engineering Co. компанияси вакиллари Ли Цинвэй ва Ванг Сянжин, шунингдек, China Wanjin International Co. раҳбарлари Сун Вэньчжэнь ва Дин Лонг билан музокаралар олиб борди.

Учрашувда Ўзбекистон ва Хитой ўртасидаги стратегик шериклик доирасида қўшма инвестиция лойиҳаларини амалга ошириш, савдо-иқтисодий алоқаларни кенгайтириш ҳамда хусусий сектор иштирокидаги ҳамкорлик истиқболлари муҳокама қилинди.

Томонлар қишлоқ хўжалиги ва агросаноат соҳаларида замонавий иссиқхона мажмуаларини барпо этиш, интенсив боғдорчиликни ривожлантириш, экспортбоп қишлоқ хўжалиги маҳсулотларини етиштириш бўйича қўшма ташаббусларни амалга ошириш, шунингдек, ушбу йўналишларда BMB HOLDINGнинг консалтинг салоҳиятидан самарали фойдаланиш ҳамда Хитойнинг илғор агротехнологияларини Ўзбекистон шароитига жорий этиш имкониятлари юзасидан фикр алмашдилар.

Шунингдек, меҳмонлар BMB HOLDING шоурумидаги экспортбоп маҳсулотлар билан танишиб, уларни ташқи бозорларга олиб чиқиш ва инвестициявий ҳамкорликни кенгайтириш масалалари бўйича мулоқот қилдилар.

Музокаралар якунида томонлар қишлоқ хўжалиги, саноат ва инфратузилма соҳаларида қўшма ташаббусларни илгари суриш, технологиялар трансферини кенгайтириш ҳамда узоқ муддатли стратегик шерикликни изчил ривожлантиришга келишиб олдилар.