Жорий йилнинг 5 октябрь куни BMB HOLDING Таъсисчилар кенгаши раиси Бекзод Маматқулов ва Италиянинг HT HOLDING президенти Роберто Туччи ўртасида навбатдаги музокаралар бўлиб ўтди.
 
Учрашувда BMB HOLDING ҳамда HT HOLDING ўртасидаги инвестициявий ҳамкорликни ривожлантириш, амалга оширилаётган қўшма лойиҳаларни кенгайтириш ва янги истиқболли ташаббусларни амалга ошириш масалалари муҳокама қилинди.
 
Таъкидланганидек, 4 октябрь куни Жиззах вилояти Бахмал туманида BMB ZA’FARON плантацияларини кенгайтириш доирасида ўтказилган тадбирда Бекзод Маматқулов ва Роберто Туччи бирга иштирок этиб, янги майдонларга заъфарон пиёзбошларини намунавий экиш жараёни билан танишдилар. Мазкур ишлар экин майдонларини босқичма-босқич кенгайтириш ва ишлаб чиқариш салоҳиятини оширишга қаратилган.
 
Музокараларда 2027 йил якунига қадар заъфарон плантациялари майдонини 2 минг гектарга етказиш вазифасини амалга оширишга алоҳида эътибор қаратилди. Шунингдек, етиштириш ҳажмини ошириш, ўзбек заъфарони ва унинг асосида тайёрланаётган маҳсулотларнинг экспорт географиясини кенгайтириш, янги халқаро бозорларга чиқиш, хусусан, АҚШдаги йирик Costco чакана савдо тармоғи билан ҳамкорликни ривожлантириш истиқболлари кўриб чиқилди.
 
Шу билан бирга, заъфарон лойиҳасидан ташқари, иқтисодиётнинг турли йўналишларида қўшма инвестициявий лойиҳаларни амалга ошириш имкониятлари муҳокама қилинди. Томонлар ўзаро манфаатли ташаббусларни амалий босқичга олиб чиқиш бўйича ишларни давом эттиришга келишиб олдилар.
 
Роберто Туччи Ўзбекистонда инвестиция ва тадбиркорлик фаолияти учун яратилаётган қулай муҳитни юқори баҳолаб, хорижий инвесторлар учун кенг имкониятлар яратилаётганини таъкидлади. У Ўзбекистон Республикаси Президенти Шавкат Мирзиёев томонидан тадбиркорлар ва хорижий инвесторларни қўллаб-қувватлаш, соҳа фаолияти ривожи йўлида яратилаётган қулай шароитлар, амалга оширилаётган ислоҳот ва ташаббуслар учун миннатдорлик билдирди.
 
Учрашув якунида томонлар ўзаро манфаатли ҳамкорликни янги босқичга олиб чиқиш, мавжуд тажриба ва имкониятлардан самарали фойдаланиш ҳамда истиқболли ташаббусларни биргаликда шакллантиришга келишиб олдилар.