Жорий йилнинг 22 апрель куни BMB HOLDING Бош офисида Ҳолдинг Бош директорининг халқаро муносабатлар, инвестициялар ва жамоат ташкилотлари билан алоқалар бўйича ўринбосари Хайрулла Набижонов ҳамда икки давлат президентлари ташаббуси билан ташкил этилган Озарбайжон-Ўзбекистон инвестиция компанияси Бош директор маслаҳатчиси Заур Бек билан учрашув бўлиб ўтди.

Учрашувда икки томонлама савдо-иқтисодий ва сармоявий ҳамкорликни янада кенгайтириш истиқболлари муҳокама қилинди. Хусусан, Ҳолдинг тизимидаги корхоналар йўналишларидан келиб чиқиб, Озарбайжон компаниялари билан қишлоқ хўжалиги, логистика, экспорт-импорт операциялари ва бошқа соҳаларда ўзаро манфаатли лойиҳаларни йўлга қўйиш имкониятлари кўриб чиқилди.

Мулоқот якунида ҳамкорликда истиқболли лойиҳалар ишлаб чиқиш ва биргаликда амалга оширишга келишиб олинди.

Маълумот ўрнида: Озарбайжон-Ўзбекистон инвестиция компанияси (AUIC) икки мамлакат президентларининг ўзаро қарорига мувофиқ ташкил этилган бўлиб, унга дастлабки давлат капитали сифатида 500 миллион АҚШ доллари ажратилган.

AUIC минимал 12-15 фоиз даромадлилик меъёрига эга янги ва мавжуд лойиҳаларга йўналтирилган бўлиб, бир лойиҳага 1 миллион АҚШ долларидан 25 миллион АҚШ долларигача маблағ киритади ва инвестиция муддати 5-7 йилни ташкил этади.

Бош қароргоҳи Ўзбекистоннинг Тошкент шаҳрида жойлашган.