Жорий йилнинг 23-24 июль кунлари BMB HOLDING бош директори ўринбосари Сардор Розукулов бошчилигидаги делегация амалий ташриф билан Россия Федерациясининг Москва шаҳрида бўлиб турибди.

23 июль куни делегация аъзолари Frozen Russia компанияси бош директори Анна Гребнева ҳамда Masterfood ташкилоти савдо бўлими бошлиғи Бахтиёр Мамадов билан учрашувлар ўтказилди.

Музокаралар давомида, томонлар ўзаро манфаатли шартларда Ўзбекистондан қуритилган ва музлатилган мева-сабзавот маҳсулотларини Россия бозорларига етказиб бериш борасида келишувга эришдилар.

Сўнг, BMB HOLDING делегацияси Москва шаҳри ва вилоятидаги энг йирик мева-сабзавот маҳсулотлари улгуржи-тақсимот маркази бўлган Food City мажмуасига ташриф буюрди ва у ерда Ўзбекистондан олиб келинган қишлоқ хўжалиги маҳсулотларининг савдоси мониторинг қилинди.

24 июль куни улгуржи тарқатиш марказлари миллий ассоциацияси ижрочи директори Владимир Лешук билан Холдинг томонидан мамлакатимизда етиштирилаётган юқори сифатли мева-сабзавот маҳсулотларини Россиянинг йирик бозорларига етказиб бериш йўналишида ҳамкорликни йўлга қўйиш келишиб олинди.

Умуман олганда, ишчи ташриф давомида бўлиб ўтган барча учрашувлар яқин келажакда ўз самарасини берган ҳолда, мамлакатимизда етиштирилаётган юқори сифатли маҳсулотларни қисқа муддат ичида истеъмолчиларга етказиб бериш имконини янада кенгайтиради.

BMB HOLDING делегациясининг Россия Федерациясига бўлган ишчи ташрифи ўз ниҳоясига етди.

BMB HOLDING Ахборот хизмати