Жорий йилнинг 3 март куни BMB HOLDING бош офисига Латвия Республикасининг Ўзбекистондаги Фавқулодда ва Мухтор элчиси Гиртс Яунземс бошчилигидаги делегация ташриф буюрди. Музокараларда Латвиянинг савдо ваколатхонаси раҳбари Георгий Воевода, Вентспилс порти директори Игорс Удодовс, Рига порти директори ўринбосари Эдгарс Суна, Латвия темир йўллари бошқарув кенгаши раиси Ринальд Плявниекс ҳам иштирок этдилар.

Учрашув аввалида BMB HOLDING бош директори ўринбосари Хайрулла Набижонов меҳмонларга Холдинг таркибидаги корхоналарнинг асосий фаолият йўналишлари, экспорт салоҳияти, амалга оширилаётган қўшма-инвестицион лойиҳалар ҳамда бугунги кунга қадар эришилган натижалар ҳақида атрофлича маълумот берди.

Элчи Гиртс Яунземс бугунги кунда BMB HOLDING Европа Иттифоқи, хусусан, Латвия ишбилармон доиралари вакиллари билан ўзаро манфаатли ҳамкорлик алоқалари йўлга қўйилгани ҳамда мазкур йўналишда амалий ишлар изчил давом эттирилаётганини мамнуният билан қайд этди.

Суҳбат давомида Вентспилс ва Рига порти раҳбарлари Холдинг маҳсулотлари учун махсус ҳаб тузиш ҳамда бу йўл орқали Европанинг кўплаб давлатлари ҳамда АҚШ бозорига кириб бориш имкониятлари борлигини таъкидлаб ўтдилар. 

Шунингдек, Ўзбекистон ва Латвия ҳудудларида қўшма лойиҳаларни амалга ошириш истиқболлари, логистика соҳасида ҳамкорликни йўлга қўйиш, жумладан, қўшма корхона ташкил этиш масалалари юзасидан ҳам фикр алмашилди.

Учрашув якунида томонлар ўзаро манфаатли ҳамкорликни янада ривожлантириш, савдо-иқтисодий алоқаларни янада кенгайтириш ва янги қўшма инвестицион лойиҳаларни амалга ошириш йўналишларида яқиндан ҳамкорлик қилиш бўйича келишувга эришдилар.