Жорий йилнинг 18 июнь куни BMB HOLDING тижорат директори Бекзод Йўлдошев ҳамда Эрон Ислом Республикасининг Ўзбекистондаги Элчихонаси вакиллари иштирокида эронлик тадбиркорлар билан учрашув бўлиб ўтди.
 
Мулоқот давомида Ўзбекистон ва Эрон ўртасидаги савдо-иқтисодий муносабатларни янада ривожлантириш, ўзаро товар айирбошлаш ҳажмини ошириш ҳамда қишлоқ хўжалиги маҳсулотлари экспортини кенгайтириш масалалари муҳокама қилинди.
 
Шунингдек, томонлар сўнгги йилларда Ўзбекистон ва Эрон ўртасидаги дўстона муносабатлар изчил мустаҳкамланиб, савдо, инвестиция, транспорт-логистика, туризм ҳамда бошқа қатор соҳаларда ҳамкорлик янги босқичга кўтарилаётганини алоҳида таъкидладилар.
 
Учрашувда меҳмонларга Янги Ўзбекистонда амалга оширилаётган иқтисодий ислоҳотлар, тадбиркорликни қўллаб-қувватлаш бўйича яратилган қулай шарт-шароитлар ҳамда ташқи савдо ва саноат кооперациясини ривожлантиришга қаратилган кенг имкониятлар ҳақида батафсил маълумот берилди.
 
Хусусан, Ўзбекистондан Эрон бозорига дуккакли экинлар экспортини кенгайтириш, ипак маҳсулотлари ҳамда қишлоқ хўжалигида қўлланиладиган ўғитлар етказиб бериш ҳажмини ошириш масалалари юзасидан фикр алмашилди.
 
“Mahd-e-Binaloud Trade Co.” компанияси директори Маҳмуд Рохсат мамлакатимизда кейинги йилларда амалга оширилаётган кенг кўламли ислоҳотлар ва иқтисодий ўзгаришларни юқори баҳолаб, Ўзбекистон билан ҳамкорликни янада кенгайтиришдан манфаатдор эканини билдирди.
 
Конструктив ва дўстона руҳда бўлиб ўтган учрашув якунида томонлар савдо-иқтисодий ва инвестициявий ҳамкорликни янада мустаҳкамлаш, янги қўшма ташаббусларни амалга ошириш ҳамда узоқ муддатли шериклик муносабатларини ривожлантириш бўйича мулоқотларни давом эттиришга келишиб олдилар.