Жорий йилнинг 30 январь куни Италия пойтахти Рим шаҳрида BMB HOLDING Таъсисчилар кенгаши раиси Бекзод Маматқулов ҳамда Ўзбекистон Республикасининг Италиядаги Фавқулодда ва Мухтор элчиси Абат Файзуллаев ўртасида учрашув бўлиб ўтди.

Учрашув аввалида томонлар Ўзбекистон ва Италия ўртасидаги савдо-иқтисодий ҳамкорлик сўнгги йилларда жадал суръатларда ривожланиб бораётганини мамнуният билан қайд этдилар.

Хусусан, бу йўналишдаги ютуқлар сирасига куни кеча BERLUSCONI FINANZIARIA компанияси президенти Паоло Берлускони билан тоғ-кон саноати ҳамда энергия тежовчи замонавий технологияларни мамлакатимизда жорий этишга қаратилган лойиҳалар, шунингдек, Business Integration Partners (BIP) компаниясининг Италиядаги офиси Президенти маслаҳатчиси Алессандро Момбеллони билан BMB HOLDING таркибидаги корхоналарни Молиявий ҳисоботнинг халқаро стандартлари (МҲХС) тизимига ўтказиш ишларини давом эттириш юзасидан эришилган келишувларни киритиш мумкин.

Шу билан бирга, Италиялик ҳамкорлар билан биргаликда юртимизда самарали амалга оширилиб келинаётган заъфарон етиштириш, уни қайта ишлаш ва экспорт қилиш лойиҳаси ҳам икки мамлакат ўртасидаги самарали савдо-иқтисодий ҳамкорликнинг ёрқин мисолларидан бир эканлиги элчи А.Файзуллаев томонидан қайд этиб ўтилди.

Конструктив ва дўстона руҳда ўтган учрашув якунида томонлар Италия ишбилармон доиралари вакиллари билан инвестиция ҳамда савдо-иқтисодий йўналишларидаги мавжуд ҳамкорлик алоқаларини янада кенгайтириш, шунингдек мамлакатимиз иқтисодиётига хорижий инвестицияларни жалб қилишда мулоқотни давом эттиришга келишиб олдилар.