Жорий йилнинг 25 март куни BMB HOLDING Бош директори ўринбосари Хайрулла Набижонов ҳамда Netherlands Fruit Solutions Uzbekistan координатори Альфред Эверс ўртасида учрашув бўлиб ўтди.

Мулоқот аввалида Альфред Эверс бошчилигидаги Нидерландиянинг қишлоқ хўжалиги соҳасида фаолият юритиб келаётган бир гуруҳ йирик тадбиркорларидан иборат бўлган делегациянинг жорий йил 23 март куни BMB HOLDING тизимига кирувчи корхоналарга амалга оширган ташрифи юқори даражада ташкил этилгани алоҳида таъкидланди.

Хусусан, ташриф давомида меҳмонлар BMB AGRO PLUS ҳамда BMB NRC AGROLOGISTICS корхоналарининг фаолияти, ишлаб чиқариш қувватлари ва замонавий қайта ишлаш технологиялари билан яқиндан танишдилар.

Томонлар ушбу ташриф икки давлат ишбилармон доиралари ўртасида ўзаро ишонч ва манфаатли ҳамкорликни янада мустаҳкамлаш, қишлоқ хўжалиги соҳасида янги лойиҳаларни амалга ошириш учун мустаҳкам замин яратганини қайд этдилар.

Музокаралар давомида қишлоқ хўжалиги экинларини етиштиришда сув ресурсларидан оқилона ва самарали фойдаланиш, ҳосилдорликка салбий таъсир кўрсатмаган ҳолда сув сарфини қисқартиришга қаратилган илғор агротехнологияларни жорий этиш масалалари муҳокама қилинди. Шу билан бирга, қишлоқ хўжалиги маҳсулотларини етиштириш йўналишида тажриба алмашиш, хорижий илғор амалиётларни жорий этиш ва соҳада инновацион ёндашувларни татбиқ этиш юзасидан фикр алмашилди.

Учрашув якунида меҳмонлар BMB HOLDING вакилларини жорий йилнинг май ойи охирида Нидерландияга ташриф буюриб, замонавий агротехнологиялар ва ишлаб чиқариш жараёнлари билан танишишга таклиф этдилар.

Умуман олганда бўлиб ўтган музокаралар қишлоқ хўжалиги соҳасида икки томонлама ҳамкорликни янги босқичга олиб чиқиш, халқаро тажриба алмашинувини кенгайтириш ва агросаноат соҳасида қўшма инвестицион лойиҳаларни амалга оширишга хизмат қилади.